Elektrik avtomobillərinə dair tələbləri yumşaldılır

Böyük Britaniya hökuməti elektrik avtomobillərin satış hədəflərinə dair tələbləri yumşaldıb.

Avtosfer.az “Azərtac”a istinadla xəbər verir ki, qərar ABŞ-ın avtomobil idxalına tətbiq etdiyi 25 faizlik tariflər fonunda qəbul olunub.

Əvvəlki qaydalara əsasən, avtomobil istehsalçıları hər il daha çox sayda elektrik avtomobili satmalı idilər. 2024-cü ildə satılan yeni avtomobillərin ən azı 28 faizinin elektrik olması tələb olunur. Bu göstərici hər il artırılaraq 2030-cu ilə qədər avtomobil satışlarının böyük əksəriyyətinin elektrik olması, benzin və dizel modellərinin isə bazardan çıxarılması planlaşdırılırdı. Yeni dəyişikliklərə əsasən, istehsalçılar bu hədəflərə çatmaqda daha çox elastiklik qazanacaq və cərimələr azaldılacaq.

Nəqliyyat naziri Haydi Aleksandr bildirib ki, bu dəyişikliklər möcüzəvi həll yolu olmasa da, ABŞ-ın tariflərinə cavab vermək üçün atılan addımların bir hissəsidir.

ABŞ Prezidenti Donald Trampın ötən həftə qüvvəyə minən qərarı ilə ABŞ-a idxal olunan avtomobillərə 25 faiz vergi tətbiq edib. Bu, Britaniyanın avtomobil sənayesi üçün mühüm ixrac bazarı olan ABŞ-a göndərilən məhsullara ciddi təsir göstərəcək.

Bundan əlavə, Tramp Britaniyadan idxal edilən demək olar ki, bütün məhsullara 10 faizlik vergi tətbiq etdiyini də açıqlayıb.