Elektromobillər daha az sürülür

Bir çox avtomobil sahibi benzin mühərrikli avtomobili elektromobillə dəyişərkən ilk növbədə belə bir məqsəd güdür: ucuz elektriki şəbəkədən doldurub istədiyim qədər sürəcəm, bahalı benzindən canım qurtaracaq. Amma reallıq başqa cürdür. Məlum olub ki, yanacaqla işləyən maşınlar daha çox sürülürmüş.

Avtosfer.az xarici mediaya istinadla xəbər verir ki, son tədqiqatlar elektromobillərin daha az sürüldüyünü göstərir. Müxtəlif ölkələrdə 2022-2024-cü illərdə alınmış avtomobillərin gedişlərinin təhlili nəticəsində ortaya maraqlı fakt çıxıb. Məlum olub ki, benzin və dizel mühərrikli avtomobillər ildə orta hesabla 16 800 kilometr yol qət edərkən, elektromobillərin orta illik yürüş məsafəsi 12 500 kilometr təşkil edir. Başqa sözlə, onlar ənənəvi maşınlarla müqayisədə ildə 25 faiz daha az istismar olunur. 

Elektromobillərin daha az istismar edilməsinin səbəbi də heç kimə sirr deyil: bu texnika adətən şəhərdə sürülür, çox adam uzaq yola elektromobillə çıxmaqdan çəkinir. Ən əsası, isti və soyuq havalarda bu texnikadan komfortlu istifadə çətindir.

Vüqar