"General Motors" Çinə avtomobil tədarükünü dayandırır

ABŞ-nin ən böyük avtomobil istehsalçısı olan "General Motors" (GM) Çinə avtomobil tədarükünü dayandırmaq qərarına gəlib. Şirkət bu barədə artıq Çindəki ixrac bölməsinin diler və əməkdaşlarını məlumatlandırıb. Avtosfer.az-ın Oxu.az-a istinadla xəbərinə görə, bu barədə "General Motors" nümayəndəsi jurnalistlərə açıqlama verib.

Nümayəndənin sözlərinə görə, Çinin premium avtomobil seqmentinə yönəlmiş "GM Durant Guild" platforması vasitəsilə ABŞ-dən idxal olunan avtomobillər ölkədəki ümumi satışların 0.1 faizindən azını da təşkil edib.

"İqtisadi mühitdə baş verən mühüm dəyişikliklər səbəbindən biz "Durant Guild" platformasını yenidən qurmaq qərarına gəldik", - deyə korporasiyanın bəyanatında bildirilir.

Bununla yanaşı, "GM China"nın ümumi fəaliyyətinin də optimallaşdırılacağı qeyd olunub.

Qeyd edək ki, "General Motors" Çində fəaliyyətini SAIC şirkəti ilə birgə yaratdığı müəssisələr vasitəsilə davam etdirir.