İsti avtomobili saniyələr içində necə sərinlətmək olar?

Kembric Universitetinin professoru Hanna Fray yay aylarında içərisi "soba"ya dönən avtomobilləri saniyələr içində sərinlədəcək fiziki bir üsul paylaşıb. Cəmi bir şüşəni endirib sürücü qapısını bir neçə dəfə sürətlə aç-bağ edərək içəridəki isti havanı xaricə "vakumlayan" bu üsul qəribə görünsə də, elmi cəhətdən tamamilə işə yarayır.

Avtosfer.az xəbər verir ki, avtomobili kölgəyə qoya bilməyən hər bir sürücü qapını açan kimi üzünə vuran o boğucu istidən xəbərdardır.

Əksəriyyət ya bütün qapıları açaraq gözləməyi, ya da kondisioneri ən yüksək rejimə qoymağı seçir. Lakin fizika qanunlarına əsaslanan bu üsul çox daha sürətlidir.

Avtomobilin sağ arxa şüşəsini (çəp şüşə) tamamilə aşağı endirin.

Avtomobildən kənara çıxın və sürücü qapısını tutun.

Sürücü qapısını sürətli və güclü bir şəkildə ard-arda açın və bağlayın.

İsti havanı xaricə vuran gizli güc: "Mənfi Təzyiq"

Professor Fray bu üsulun arxasındakı elmi izah edir:

"Sürücü qapısını sürətlə açmaq və bağlamaq, avtomobilin içində mənfi təzyiq yaradır. Bu hərəkət fiziki olaraq 'kütlə axını' (mass flow) hadisəsini tətikləyir. Qapının yaratdığı emiş gücü, içəridəki bütün isti havanı sanki bir vakum kimi çölə sorur. Eyni anda, qarşı tərəfdə açıq saxladığınız arxa şüşədən içəri sürətlə təzə və nisbətən daha sərin hava dolur."

Keçirilən müstəqil sınaqlar bu üsulun effektiv olduğunu təsdiqləyir. Lakin nəzərə almaq lazımdır ki:

Bu üsul xarici havanın içəridəki havadan daha sərin olduğu bahar aylarında mükəmməl işləyir. Yayda isə çöldəki hava da çox isti olduğu üçün kondisioneri tam əvəz etməsə də, ilkin boğucu istiliyi dərhal qovur.

Qapı qolunu və petlələri davamlı olaraq çox sərt çəkmək uzun müddətdə avtomobilin qapı mexanizminə zərər verə bilər.

Avtomobilin yanında dayanıb tək bir qapını dəli kimi aç-bağ etmək kənardan çox qəribə görünə bilər və qonşularınızı narahat edə bilər.

Əgər insanların sizə qəribə baxmasından çəkinirsinizsə və ya tələsmirsinizsə, ənənəvi üsul hələ də ən etibarlıdır: Minən kimi bütün şüşələri tam aşağı endirin və yola çıxın; hərəkət zamanı yaranan təbii külək isti havanı sürətlə çıxaracaq və kondisioner içərini ideal temperatura gətirəcək. (Milli.az)