Laboratoriya bitki yağına yüksək keyfiyyətli mühərrik yağı sertifikatı verdi - FOTO

Rusiyalı jurnalistlər maraqlı bir eksperiment aparıblar. 

Avtosfer.az xəbər verir ki, “İzvestiya” nəşrinin əməkdaşları marketdən alınmış pambıq yağına bir qədər işlənmiş yağ və dizel yağı qataraq 6 laboratoriyaya yoxlama üçün göndəriblər. sözügedən yağ Özbəkistandan idxal edilib və əsasən plov hazırlanmasında istifadə edilir.

Laboratoriyaların hər biri ilə müqavilə imzalanıb və rəsmi sənəd alınıb. Necə deyərlər, qiyamət də bundan sonra qopub. Laboratoriyalar bütün yağlarla bağlı sınaqları protokollaşdırıb və uyğunluq sertifikatı verib.

Jurnalistlər iddia edirlər ki, sertifikatlar internetdən götürülərək “standarta uyğundur” qrafası əlavə edilib, imzalanıb, möhürlənib.  Sınaq protokollarını verməkdən bütün laboratoriyalar imtina edib. 

Sayta müsahibə verən kimyaçılar bildiriblər ki, bitki yağı ilə mühərrik yağı hansısa parametrinə görə oxşar ola bilər. Lakin bunların müasir laboratoriyada ayırd edilə bilməməsi qeyri-mümkündür.   

Jurnalistlər isə bildirirlər ki, Ukrayna müharibəsindən sonra qlobal şirkətlərin Rusiyada  fəaliyyəti məhdudlaşıb. Bundan istifadə edən işbazlar saxta məhsulları yerli laboratoriyalarda “yoxlatdırıb” uyğunluq sertifikatı alırlar. Bunun əzabını isə sürücülər çəkir. 

Qeyd edək ki, bu cür saxtakarlıqlar keçmiş SSRİ məkanından məhsulların Avropa bazarına ixracına mane olur. Dəfələrlə yerli laboratoriyalardan sertifikat almış məhsullar xaricdə təkrar yoxlanarkən yararsız çıxıb.

Vüqar Yaşaroğlu