Maşını doludan belə qorumaq olar - Mütəxəssislərdən tövsiyə

Dolu zamanı avtomobillərə dəyən zərər sürücülər üçün ciddi xərclər yaradır. Maşını təbiət hadisələrindən qorumaq üçün həm bahalı, həm də sadə üsullardan istifadə etmək mümkündür. Avtosfer.az xəbər verir ki, sinoptiklər dolu xəbərdarlığı etdikdə ilk növbədə avtomobili qapalı dayanacaqlarda, ticarət mərkəzlərinin yeraltı parkinqlərində və ya yanacaqdoldurma məntəqələrinin çardaqları altında saxlamaq ən etibarlı yoldur. Əgər yaxınlıqda belə yer yoxdursa, maşını hündür binaların yağışın istiqamətinə əks olan tərəfində park etmək zərbənin gücünü azalda bilər. Açıq havada qalan nəqliyyat vasitələri üçün xüsusi dolu əleyhinə örtüklər satılır. Bu örtüklər qalın süngər qatına malik olduğu üçün buz parçalarının enerjisini udur. Belə avadanlığı olmayan sürücülər isə daha praktik üsullara əl atırlar. Maşının kapotuna və damına qalın adyallar, köhnə xalçalar və ya rezin ayaqaltılar sərərək onları iplə bərkitmək olar. Hətta karton qutuları açıb şüşələrin üzərinə düzmək də müvəqqəti qorunma təmin edir. Yol hərəkəti zamanı dolu düşməyə başlayarsa, dərhal sürəti azaldıb təhlükəsiz yerdə dayanmaq lazımdır. Çünki hərəkət edən avtomobilə dəyən dolunun zərbə qüvvəsi dayanmış vəziyyətdəkindən ikiqat daha çox olur. Mütəxəssislər dolu bitənə qədər salonda qalmağı və şüşələrdən uzaq durmağı tövsiyə edirlər. Avtomobil sığortasının növü də belə hallarda mühüm rol oynayır. Kasko sığortası olan sürücülər dəyən zərəri sığorta şirkətindən tələb edə bilərlər. Lakin icbari sığorta təbiət hadisələri zamanı dəyən ziyanı qarşılamır. (Demokrat.az)