"Porsche", "Lamborghini" və "Audi" avtomobillərində yanğın təhlükəsi aşkarlandı

"Volkswagen" şirkəti yanğın təhlükəsinə görə üç marka - "Porsche", "Lamborghini" və "Audi"yə məxsus bir sıra avtomobillərin geri çağırıldığını elan edib.

Avtosfer.az "Carscoops"a istinadən xəbər verir ki, geriçağırılmaya "Lamborghini Urus" krossoverləri ilə bağlı iki insident səbəb olub. Avtomobillərdən biri alovlanıb, digəri yanacaq axıdıb.

Geriçağırılma 107 ədəd "Porsche Panamera" və "Porsche Cayenne S", 14 ədəd "Lamborghini Urus" və bir ədəd "Audi SQ7"yə aiddir. Avtomobillər 2024-cü ildən bu günə qədər istehsal olunub.

Ehtimal olunur ki, yanacaq nasosu etibarlı şəkildə bağlanmayıb və bu da yanacaq sızmasına səbəb olub. Məlumata görə, dilerlər lazımi ehtiyat hissələrini pulsuz dəyişdirəcəklər.