Qışda avtomobillərin yanacaq sərfiyyatı niyə artır? - Mütəxəssis AÇIQLADI - FOTO

Qış mövsümü nəqliyyat vasitələrinin istifadəsində bir çox çətinliklər yaradır. Soyuq havalarda avtomobillərin işə düşməsi, mühərrikin iş rejiminin dəyişməsi və sürüş şəraitinin mürəkkəbləşməsi kimi hallar təkcə sürücülərin rahatlığını deyil, həm də avtomobilin yanacaq sərfiyyatına birbaşa təsir edir. Xüsusilə qışın sərt keçdiyi bölgələrdə sürücülər mühərrikin daha çox yanacaq sərf etdiyini müşahidə edir. Bu, gündəlik istifadə zamanı əlavə xərclərə səbəb olmaqla yanaşı, avtomobilin ümumi performansını da təsir edir.

Mələsə ilə bağlı avtomobillər üzrə mütəxəssis Elçin Abbasov Avtosfer.az-a bildirib ki, qış aylarında avtomobillərin yanacaq sərfiyyatı bir çox faktorlara görə artır. “Soyuq hava şəraitində mühərrik tam effektiv işləyə bilmir. Mühərrikin qızıdırılması üçün əlavə yanacaq tələb edir. Soyuq yağı qatılaşdırır və mühərrikdə müqavimət yaradır ki, bu da yanacaq sərfiyyatını artıran əsas səbəblərdən biridir. Avtomobillərdə istifadə edilən qızdırıcılar, peçlər və arxa şüşə qızdırıcıları da enerji sərf edir. Bu cihazlar elektriklə işləsə də, elektrik enerjisi nəticə etibarilə yanacaqdan təmin edilir. Qış mövsümündə avtomobilin sürətinin aşağı düşməsi də yanacaq sərfiyyatını artırır. Sürət optimal həddən aşağı olduqda mühərrik daha çox yanacaq sərf edir”.

Ekspert yanacaq sərfiyyatını azaltmaq üçün bir neçə tövsiyə verib. O qeyd edib ki, yerində avtomobili qızdırmaq tez-tez buraxdığımız səhvlərdən biridir. “İstehsalçının tövsiyə etdiyi yağdan istifadə edilməli və mühərrikdə təkləmə olmamalıdır. Soyuq havada təkər təzyiqi azalır, buna görə də istehsalçının tövsiyə etdiyi təzyiq səviyyəsinə diqqət yetirilməlidir. Həmçinin kirlənmiş hava filtri mühərrikin işini çətinləşdirir və əlavə yanacaq sərfiyyatına səbəb olur. Onu vaxtında dəyişdirmək vacibdir. Avtomobilin yol şəraitinə uyğun optimal sürətlə idarə edilməsi tövsiyə olunur. Yerində avtomobili qızdırmaq yanacağın israfına səbəb olur. Mühərriki işə salıb yavaş-yavaş sürərək avtomobili qızdırmaq daha məqsədəuyğundur. Avtomobilin yük yeri və salonunda artıq əşyalar saxlanılmamalıdır. Həddən artıq yüklər yanacaq sərfiyyatını artırır. Arxa şüşə qızdırıcısı, kondisioner və digər elektrik avadanlıqlarından yalnız zərurət olduqda istifadə edilməlidir”.

Fidan Məmmədova