Süni intellekt avtomobil dələduzlarının xidmətində

Dünyanın hər yerində onlayn alış veriş və nağdsız ödənişlər adi hala çevrilib. Bu da təəssüf ki, sadə insanlarla yanaşı, dələduzların da işinə yarayır. 

Avtosfer.az xəbər verir ki, avropalı istehsalçılar məsələ ilə bağlı həyəcan təbili çalırlar. “Volkswagen” şirkətinin bu günlərdə yaydığı pres-relizdə məsələnin təfərrüatı açıqlanır. 

Sxem belə işləyir: şirkətin adına oxşar sayt yaradılaraq az işlənmiş avtomobillər ucuz qiymətə təklif edilir. Məsələn “volkswagen-fahrzeuge.de”, “volkswagendasauto.de” və “vw-kundenportal.de” saytlarının istehsalçıya heç bir aidiyyəti yoxdur. Saytlar avtomobil seçildikdən sonra məbləğin hansısa hesaba ödənilməsini tələb edir. Ödənişdən sonra isə heç kimlə əlaqə saxlamaq mümkün olmur. Ötən gün Belçikadan bir nəfərin bu yolla 19 min avrosu mənimslənilib. 

Oxşar açıqlama ilə Almaniyanın başqa istehsalçıları da çıxış ediblər. Onlar bildiriblər ki, maşınlar onlayn deyil, yalnız dilerlərdə satılır. Fiziki olaraq görmədiyiniz maşınla bağlı heç bir sövdələşməyə getməyin. 

Bu yerdə dələduzların köməyinə süni intellekt (Sİ) gəlir. Onun vasitəsi ilə orijinalla tam oxşar sənədlər hazırlamaq, avtomobilin fotolarını korreksiya etmək, yaxud mövcud polmayan maşını düzəltmək mümkündür. Məsələn, bu fotoda gördüyünüz, endirimlə təklif edilən “Mercedes” fiziki olaraq mövcud deyil, Sİ vasitəsilə düzədilib. 

Nəzərə alaq ki, ölkəmizdə Çin maşınları populyarlaşsa da, hələ də Avropa avtomobillərinə maraq azalmayıb. Almaniya, Belçika və digər ölkələrin saytlarında bu gün də həmvətənlərimiz avtomobil axtarırlar.

Vüqar Yaşaroğlu