"Tesla" işi sürətləndirdi: Həftədə 5 min elektromobil

"Tesla" şirkətinin rəhbəri Elon Mask yeni "Model 3" elektromobillərinin istehsalında həftədə 5 min ədəd rəqəminə nail olduqlarını açıqlayıb.

Avtosfer.Az lent.az-a istinadən xəbər verir ki, E. Mask bu barədə əməkdaşlara göndərdiyi daxili məktubunda bildirib. O, gələn ay 6 min ədəd göstəricisinə nail olmağa ümid etdiyini söyləyib: "Hesab edirəm ki, biz əsl avtomobil istehsalı şirkətinə çevrildik". 

E. Mask deyib edib ki, 5 min "Model 3"dən əlavə, 2 min ədəd "Model X" və "Model S" də buraxılıb. "7 gündə 7000 avtomobil", - deyə o, "Twitter"də qeyd edib. İş adamı əməkdaşların fərasətini tərifləyib.

Qeyd edək ki, şirkət ayda 5 min ədəd göstəricisinə 2017-ci ilin sonunda nail olmağı planlaşdırırdı, lakin texnoloji prosesdə baş verən problemlər üzündən bu plan baş tutmayıb. "Tesla" "Model 3"ün yığımına 2017-ci ilin iyulunda başlayıb. Bu avtomobilin qiyməti 35 min dollardan başlayır. Maksimal sürət saatda 210 km təşkil edir. 100 km sürət 5,6 saniyəyə yığılır. Bir dəfə doldurulmaqla 350 km getmək olur.