Yay aylarında avtomobil yanğınları niyə daha çox baş verir? - USTA

Yayda avtomobillərdə yanğın riski artır.

Ən böyük təhlükə köhnə maşınlar və qeyri-peşəkar müdaxilələrdir. Xüsusilə texniki nasazlığı olan və elektrik sisteminə sonradan müdaxilə edilmiş avtomobillərdə bu risk daha yüksək olur.

Mövzu ilə bağlı avtomobil ustası Dəniz Ağabəyli Avtosfer.az-a açıqlamasında bildirib ki, yay aylarında avtomobillərdə yanğın hadisələrinin sayı artır və bunun bir neçə əsas səbəbi var:

"İlk növbədə, benzinlə işləyən avtomobillərdə sonradan qeyri-peşəkar şəkildə quraşdırılan əlavə avadanlıqlar yanğın riskini artırır. Avtomobilə ambient işıqlar, LED lampalar, duman əleyhinə işıqlar və digər elektrik avadanlıqları quraşdırılarkən elektrik sisteminə müdaxilə edilir. Yay aylarında havanın həddindən artıq isti keçməsi və mühərrikin daha çox qızması nəticəsində sonradan çəkilmiş naqillərdə qısaqapanma baş verir ki, bu da avtomobilin alışmasına səbəb ola bilər. Daha çox yanğın hadisələri köhnə avtomobillərdə müşahidə olunur".

Dəniz Ağabəyli əlavə olaraq qeyd edib ki, yeni avtomobilər baş verən yanğınların əsas səbəbi sonradan quraşdırılan əlavə avadanlıqlardır:
"İstismar müddəti çox olan avtomobillərdə isə əsas risk yanacaq sızmaları ilə bağlıdır. Dizel mühərrikli avtomobillərdə yanacaq sistemində hər hansı sızma olarsa, bu yanğınla nəticələnə bilər. Benzin mühərrikli avtomobillərdə isə forsunkalar, şlanqlar və onlara gedən elektrik naqillərində yaranan nasazlıqlar da alışma riskini artırır.

Yay mövsümündə sürücülər avtomobillərinə mütəmadi texniki qulluq etdirməli, xüsusilə də elektrik və yanacaq sistemini yoxlatdırmalıdırlar. Bu, həm uzun yolda yaranacaq nasazlıqların, həm də mümkün yanğın hadisələrinin qarşısını almağa kömək edəcək".

Fatimə