30 min dollarlıq üzüyü zibillikdən dörd dəqiqəyə tapdılar

ABŞ-ın Kaliforniya ştatında San-Dieqo şəhərindən olan ailə təsadüfən qiyməti 30 min dollardan artıq olan üzüyü zibilliyə atsa da, kommunal xidmətlər onu tapmaqda yardımçı olublar. Avtosfer.az-ın oxu.az-a istinadən məlumatına görə, üzük evdə təmizlik apararkən zibil yeşiyinə atılıb. Ev sahibləri itkidən xəbər tutana kimi yeşik artıq zibilliyə aparılıb. Ailə kömək üçün şəhər rəhbərliyinə müraciət edib. İşçilər GPS-in köməyilə hansı zibildaşıyanın onların məhəlləsinə gəldiyini müəyyənləşdirib və beləliklə, zibilin töküldüyü yeri taparaq, qısa vaxtda üzüyü aşkarlayıblar. “Bəzən nəyisə tapmaq üçün üç, yaxud dörd saat lazım olur. Bəzən isə tapmaq mümkün olmur, - deyə San-Dieqo rəhbərliyinin nümayəndəsi bildirib. – 30 min dollarlıq üzüyü dörd dəqiqəyə tapmaq – heç də pis deyil”.