ABŞ ilə süni intellekt sahəsində tərəfdaşlıq ölkəyə nə qazandıracaq? - Ekspert AÇIQLADI

Azərbaycan və ABŞ süni intellekt sahəsində əməkdaşlıq çərçivəsində yeni addımlar atıb. Fevralın 10-u Azərbaycan və ABŞ arasında “Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq haqqında Xartiya” imzalanıb və həmin məsələ bu sənəddə öz əksini tapıb.

Avtosfer.az xəbər verir ki, sənəd çərçivəsində tərəflər "AI" texnologiyalarının inkişafını, rəqəmsal infrastrukturun gücləndirilməsi sahəsində əməkdaşlıq edəcəklər. Bu addım Azərbaycan üçün yalnız texnoloji tərəqqi demək deyil, həm də innovasiya sahəsində strateji inkişaf yolunu açır. Eyni zamanda ölkəmizin beynəlxalq əməkdaşlıq sahəsində mövqeyini möhkəmləndirir və gənc mütəxəssislərin süni intellekt, data elmləri və kosmik texnologiyalar üzrə biliklərini artırmaq üçün yeni imkanlar yaradır.

Məsələ ilə bağlı İnformasiya texnologiyaları üzrə mütəxəssis Elvin Həsənov Avtosfer.az-a açıqlamasında bildirib ki, bu addımın ölkəmizə əsas qazancı üç istiqamətdə ola bilər:
“Süni intellekt sahəsində ABŞ kimi qabaqcıl ölkə ilə əməkdaşlıq etmək o deməkdir ki, biz sadəcə hazır məhsul istifadəçisi olmuruq, eyni zamanda texnologiyanın necə qurulduğunu, necə miqyaslandığını və necə təhlükəsiz idarə edildiyini yerində öyrənmək imkanı qazanırıq. Birincisi, bilik və təcrübə transferi qazanırıq. Çünki böyük "A"I layihələri yalnız koddan ibarət deyil onun arxasında data mərkəzləri, kibertəhlükəsizlik standartları, əməliyyat prosesləri və layihə idarəetməsi dayanır. Bu əməkdaşlıq layihələrin yerli sistemlərə uyğunlaşdırmağa kömək edəcək. İkincisi, rəqəmsal infrastrukturun sürətlənməsi ola bilər. Əlbətdəki "AI" üçün güclü hesablama, etibarlı şəbəkə və məlumat mərkəzləri lazımdır. Bu istiqamətdə atılan hər addım Azərbaycanı regionda texnoloji qovşaq, yəni data və xidmətlərin keçdiyi nöqtəyə çevirə bilər. Bu isə təkcə dövlət layihələri deyil, özəl sektor və startaplar üçün də yeni imkanlar açacaq. Üçüncüsü və deyərdim ki, ən önəmlisi insan kapitalıdır. Birgə proqramlar, təlimlər və pilot layihələr yerli mühəndislərin qlobal standartlarla işləməsinə şərait yaradacaq. Bu isə uzunmüddətdə ən böyük sərmayədir. Çünki texnologiyanı gətirmək olar, amma mütəxəssisi yetişdirmək uzun vaxt tələb edir”.
Nurcan Babək