ABŞ İrana görə beş şirkəti "qara siyahı"ya salıb

ABŞ Maliyyə Nazirliyi İranın "Mahan Air" aviaşirkəti ilə əlaqəli olduğu ehtimal edilən beş hüquqi şəxsə qarşı sanksiyalar tətbiq edib.

Avtosfer.az "Report"a istinadən xəbər verir ki, bu barədə ABŞ Maliyyə Nazirliyinin Xarici Aktivlərə Nəzarət İdarəsinin (OFAC) saytında yayımlanan açıqlamada bildirilib.

Sənədə əsasən, məhdudiyyətlər Rusiyanın "Air Cargo Pro" nəqliyyat şirkətinə, eləcə də İran, Çin və Hindistanda fəaliyyət göstərən dörd şirkətə şamil olunub. Bundan əlavə, Vaşinqton Çin vətəndaşına qarşı da sanksiyalar tətbiq edib.

Qurumun açıqlamasında qeyd olunur ki, siyahıya daxil edilən şəxslər ABŞ-nin sanksiya siyahısında olan İranın "Mahan Air" aviaşirkəti ilə əməkdaşlıq ediblər.

Sanksiya siyahısına daxil edilmə ABŞ-dəki aktivlərin dondurulması, eləcə də Amerika vətəndaşları və şirkətlərinə siyahıdakı şəxslərlə biznes əlaqələri qurmağın qadağan edilməsi deməkdir.