ABŞ NATO-dan çıxsa, nə baş verəcək? - AÇIQLAMA

ABŞ Prezidenti Donald Tramp ölkəsini NATO-dan çıxarmaq niyyətindədir.

Bəs ABŞ NATO-dan çıxarsa, bu, alyansın digər ölkələrinə necə təsir edər?

Avtosfer.az-ın məlumatına görə, mövzu ilə bağlı Redaktor.az-a danışan hərbi ekspert Ədalət Verdiyev bildirdi ki, NATO-nun aparıcı qüvvəsi olan ABŞ alyansın ümumi xərclərinin yarıya yaxınını təkbaşına qarşılasa da, son dövrlərdə üzv ölkələr arasındakı münasibətlərdə ciddi gərginlik müşahidə olunur:

"Bir çox müttəfiqlərin son müharibələrdə Vaşinqtona dəstək verməməsi, həmçinin Ukrayna böhranı və Hörmüz boğazı məsələsində yaranan fikir ayrılıqları tərəflər arasındakı çatları daha da dərinləşdirib. Xüsusilə İranla bağlı proseslərdə faktiki dəstəyin olmaması ABŞ ilə bəzi NATO üzvləri arasındakı münasibətləri ən aşağı səviyyəyə endirib. Hazırda ABŞ-nin diqqəti daha çox İranla bağlı məsələlərə yönəldiyi üçün alyansdan çıxmaq qərarı yaxın perspektiv üçün prioritet görünməsə də, bu mövzu aktuallığını qoruyur və gələcəkdə kəskin addımların atılması istisna edilmir".

Ekspertin sözlərinə görə, ABŞ-nin NATO-dan uzaqlaşması ehtimalı təşkilat üçün taleyüklü xarakter daşıyır:

"Çünki əsas daşıyıcı qüvvənin gedişi alyansın döyüş potensialının təxminən 30-40%-ni itirməsi və strukturun əhəmiyyətli dərəcədə zəifləməsi ilə nəticələnə bilər".