Ana iki uşağı xilas etmək istədi, üçü də boğuldu - Masallıda dəhşətli hadisə

Masallının Miyənkü kəndində göldə üç nəfər batıb. Avtosfer.az APA-ya istinadən xəbər verir ki, onlar Miyənkü kənd sakini, 1981-ci il təvəllüdlü Vüsalə Sabir qızı Kərimova, onun oğlu, 2009-cu il təvəllüdlü Hüseyn Şəmşir oğlu Zamanov və V. Kərimovanın qardaşı oğlu, 2007-ci il təvəllüdlü Elmar İlqar oğlu Kərimovdur. Məlumata görə, V.Kərimova ailəsi ilə birgə Masallıya istirahətə gəlib. Uşaqlarla dincəlmək üçün isə göl kənarına gedib. Göldə çimən uşaqların boğulduğunu görən V.Kərimova onları xilas etməyə çalışarkən özü də batıb. Meyitlər sudan çıxarılaraq aidiyyəti üzrə təhvil verilib.

***

Masallı rayonunda baş verən faciənin bəzi təfərrüatları məlum olub. "Report" xəbər verir ki, hadisə axşam saat 15 radələrində baş verib. Bakıdan doğulduğu Miyənkü kəndinə istirahətə gedən 37 yaşlı Kərimova Vüsalə Sabir qızı 11 yaşlı oğlu Kərimov Elmar İlqar oğlu və 9 yaşlı qardaşı oğlu Zamanov Hüseyn Şəmkir oğlu ilə birlikdə kəndin kənarında moruq dərməyə gedib. Başı moruq yığmağa qarışan ana uşaqları nəzarətsiz qoyub. Gölə girən uşaqlar batmağa başlayanda qadının kənarda oturan qızı anasına xəbər verib. Uşaqları xilas etmək üçün özünü gölə atan ana da suda batıb. Azyaşlı qız kəndə qaçaraq köməyə adam çağırıb. Lakin bir saat sonra hadisə yerinə gələnlər boğulanlara heç bir kömək edə bilməyiblər. Göldə axtarış aparan FHN-in dalğıcları batmış meyitləri iki saatdan sonra sudan çıxarıblar.

Faktla bağlı araşdırma aparılır.