Avtomobil alverçiləri süni intellektlə dələduzluq edir - DİQQƏTLİ OLUN!

Əvvəla bu xəbəri niyə yazdığımı əsaslandırmaq istərdim: Şəxsi təcrübəmizdən görmüşük ki, qonşu ölkələrdə ortaya çıxan dələduzluq modeli bir müddət sonra bizə də gəlib çatır.   

Avtosfer.az xəbər verir ki, Rusiya polisi avtomobil dəllallarının daha bir fırıldağı ilə bağlı xəbərdarlıq edib. Peterburq polisindən bildirilib ki, dələduzlar süni intellektin köməyi ilə mövcud olmayan maşının fotolarını çəkir, sənədlərini hazırlayırlar. Elan saytında yerləşdirilmiş avtomobillə maraqlanan şəxsə maşının yenə də süni intellekt vasitəsilə çox yüksək oxşarlıqla hazırlanmış sənədləri “tanışlıq üçün” göndərilir. İnandırılaraq tora düşən şəxsdən beh alındıqdan sonra elan saytdan silinir, nömrəyə isə zəng çatmır. 
Beh mərhələsi Azərbaycanda da çoxlarına tanışdır. Bu cür dələduzlardan qorunmağın saan yolu avtomobillə bağlı heç bir halda beh verməməkdir. Alverçinin “əldən çıxarılacaq maşın deyil”, “çörəkli maşındır” kimi klişelərinə aldananlar, xoş və boş vədə inanıb sənədləşməni sonraya saxlayanlar, “bu gün nəyin bahasına olursa-olsun maşın almalıyam” deyənlər dələduzlar üçün əsl yemdir. Tələsgənlik hələ ki, heç kimə fayda verməyib.

Vüqar