Avtomobil dünyasında yeni dövr; əyləc pedalı ləğv olunur

ABŞ-də yalnız muxtar idarəetmə sistemləri ilə işləyən nəqliyyat vasitələri üçün texniki tələblərin yenilənməsi istiqamətində növbəti addım atılıb.

Avtosfer.az xəbər verir ki, ABŞ Nəqliyyat Departamentinin tabeliyində fəaliyyət göstərən Milli Yol Hərəkəti Təhlükəsizliyi Administrasiyası (NHTSA) yalnız avtonom idarəetmə sistemləri tərəfindən istifadə olunacaq nəqliyyat vasitələrində əl ilə idarə olunan əyləc pedalına dair tələbin ləğv edilməsi ilə bağlı qayda dəyişikliyi prosesinə başladığını açıqlayıb.

Qurumun yaydığı məlumata görə, insan tərəfindən idarə olunması nəzərdə tutulmayan nəqliyyat vasitələri üçün şüşəsilənlər, arxa görünüş güzgüləri və digər ənənəvi idarəetmə elementlərinə dair mövcud tələblər də yenidən nəzərdən keçirilir.

NHTSA bildirib ki, təklif edilən dəyişiklik yalnız tam muxtar idarəetmə üçün hazırlanmış nəqliyyat vasitələrinə şamil olunacaq. Bununla yanaşı, əyləc sisteminin effektivliyi, əyləc məsafəsi və digər təhlükəsizlik göstəriciləri ilə bağlı mövcud standartlar qüvvədə saxlanılacaq.

Qeyd olunub ki, sükan və digər əl ilə idarəetmə elementləri ilə təchiz edilmiş avtonom nəqliyyat vasitələrinə isə hazırda qüvvədə olan bütün təhlükəsizlik tələbləri tətbiq edilməyə davam edəcək.

NHTSA-nın administratoru Conatan Morrison bildirib ki, ABŞ-nin muxtar sürücülük texnologiyaları sahəsində lider mövqeyini qoruması üçün mövcud tənzimləyici çərçivənin müasir texnologiyalara uyğunlaşdırılması vacibdir.

Onun sözlərinə görə, innovativ nəqliyyat vasitələrinin inkişafına mane olan köhnəlmiş tələblərin aradan qaldırılması, eyni zamanda əsas təhlükəsizlik standartlarının qorunub saxlanılması yol hərəkəti təhlükəsizliyinin yüksəldilməsinə xidmət edəcək.

Morrison vurğulayıb ki, bu yanaşma gələcəkdə yol-nəqliyyat hadisələrinin sayının azalmasına, insan itkilərinin minimuma endirilməsinə və nəqliyyat sisteminin daha səmərəli fəaliyyət göstərməsinə töhfə verə bilər.

Eltac Zülfüqaroğlu