Avtomobillərdən oğurluq edən şəxsin ibtidai istintaqı başa çatıb

Bakıda avtomobillərdən oğurluq etməkdə təqsirləndirilən Fərman Heydərovun cinayət işi üzrə ibtidai istintaqı başa çatıb. Avtosfert.az-ın "Report"a istinadən xəbərinə görə, cinayət işi baxılması üçün Xətai Rayon Məhkəməsinə göndərilib. Cinayət işi hakim Bəxtiyar Məmmədovun icraatına verilib. Məhkəmənin hazırlıq iclası noyabrın 28-nə təyin edilib. Qeyd edək ki, rəsmi məlumata əsasən, "102 - Zəng Mərkəzi” Xidmətinə bu il iyul ayının 31-də saat 23 radələrində Xətai rayonunun M.Hadi və Vunq Tau küçələrində Bakı şəhər sakinləri R.Fərzəliyevin “Toyota”, Ş.Nəsibovun və M.İsgəndərovun “Mercedes”, Y.Hüseynovun “Nissan” markalı avtomobillərindən yan güzgülərinin şüşələrinin oğurlandığı barədə müraciətlər daxil olub. Dərhal Xətai rayon Polis idarəsi (RPİ) 36-cı polis bölməsinin (PB) əməkdaşları tərəfindən əməliyyat-axtarış tədbirlərinə başlanılıb və oğurluqları törətməkdə şübhəli bilinən şəxs qısa müddətdə müəyyən edilərək saxlanılıb. Araşdırmalarla onun Bakı şəhər sakini F.Heydərov olduğu müəyyən edilib və şübhəli şəxs qismində saxlanılıb.