Azərbaycan DİN AMERİPOL-da müşahidəçi statusu əldə ETDİ

Azərbaycan Respublikasının Daxili İşlər Nazirliyi Amerika Polis Qüvvələri Birliyində (AMERİPOL) müşahidəçi statusu əldə edib.

Avtosfer.az xəbər verir ki, müvafiq qərar AMERİPOL Direktorlar Şurasının 5-ci Fövqəladə Sammiti çərçivəsində qəbul edilib.

Yeni status Azərbaycan DİN-in AMERİPOL-a üzv dövlətlərin aidiyyəti hüquq-mühafizə orqanları ilə əməkdaşlığının genişləndirilməsinə, beynəlxalq polis əməkdaşlığı çərçivəsində qarşılıqlı məlumat və qabaqcıl təcrübə mübadiləsinin aparılmasına, həmçinin təşkilatın müxtəlif tədbirlərində iştirak imkanlarının artırılmasına şərait yaradacaq.

Müşahidəçi statusunun əldə edilməsi, eyni zamanda, transmilli mütəşəkkil cinayətkarlıq, narkotik vasitələrin qanunsuz dövriyyəsi, kibercinayətkarlıq, ekstremizm, insan alveri və digər müasir təhdidlərə qarşı mübarizə sahəsində beynəlxalq əməkdaşlığın daha da inkişaf etdirilməsinə xidmət edəcək.

Eltac Zülfüqaroğlu