Azərbaycan ilə Pakistan arasındakı münasibətlər qarşılıqlı etimada əsaslanır - Hikmət Hacıyev

Azərbaycan və Pakistan ticarət və iqtisadi əlaqələrin daha da gücləndirilməsi üçün əhəmiyyətli potensiala malikdir. Avtosfer.az xəbər verir ki, bunu Azərbaycan Prezidentinin köməkçisi, Prezident Administrasiyasının Xarici siyasət şöbəsinin müdiri Hikmət Hacıyev "Pakistan TV"yə müsahibəsində bildirib.

O qeyd edib ki, bu potensialı reallaşdırmaq üçün işgüzar dairələr arasında əlaqələri intensivləşdirmək, investisiya imkanları barədə məlumatlılığı artırmaq və iki ölkənin özəl sektorları arasında əməkdaşlığı genişləndirmək lazımdır.

Hacıyev Azərbaycan ilə Pakistan arasındakı münasibətləri qarşılıqlı etimada və sarsılmaz dəstəyə əsaslanan strateji tərəfdaşlıq kimi xarakterizə edib.

O həmçinin iki ölkə rəhbərliyi arasında qarşılıqlı anlaşmanı yüksək qiymətləndirərək, ikitərəfli əməkdaşlığın müxtəlif sahələrdə genişlənməyə davam etdiyini qeyd edib.

“Siyasi və geostrateji səviyyələrdə Pakistanla Azərbaycan arasında münasibətlər əladır”, - deyə Azərbaycan Prezidentinin köməkçisi vurğulayıb.

Hacıyev iki ölkə vətəndaşları arasında turist səfərlərinin artmasının birbaşa hava əlaqələrinin genişləndirilməsi sayəsində mümkün olduğunu vurğulayıb. O, həmçinin xalqlar arasında mədəni əlaqələrin və təmasların daha da inkişaf etdirilməsinin vacibliyini qeyd edib.

Media sektorunda əməkdaşlığa gəldikdə, Hacıyev Pakistan jurnalistlərinin Şuşa Qlobal Media Forumunun yarandığı gündən bəri fəal iştirakını diqqətə çatdırıb.

Bundan əlavə, Azərbaycan Prezidentinin köməkçisi Pakistanın Yaxın Şərqdəki son gərginlik dövründə vasitəçilik rolunu yüksək qiymətləndirib: "Pakistan rəhbərliyi qiymətli vaxtını və səylərini sülh işinə həsr edir".

Onun sözlərinə görə, Pakistanın konstruktiv rolu İslamabadın qlobal proseslərdə artan geostrateji əhəmiyyətindən xəbər verir.