Azərbaycanda əhali daha çox bu nəqliyyatdan istifadə edir

Bu ilin yanvar-aprel ayları ərzində Azərbaycanda nəqliyyat sektorunda fəaliyyət göstərən təsərrüfat subyektləri tərəfindən 67,9 milyon ton yük daşınıb və 2017-ci ilin müvafiq dövrünə nisbətən 0,5 faiz artım müşahidə olunub. Avtosfer.az “Trend”ə istinadən xəbər verir ki, yüklərin 4,2 faizi dəniz, 6,4 faizi dəmir yolu, 0,1 faizi hava, 61,1 faizi avtomobil nəqliyyatı, 28,2 faizi isə boru kəməri ilə daşınıb.

Hesabat dövründə nəqliyyatçılar 619,9 milyon nəfərə və ya 2017-ci ilin eyni dövrü ilə müqayisədə 1,6 faiz çox sərnişinə xidmət göstəriblər. Sərnişinlərin 87,2 faizi avtomobil nəqliyyatı, 12,6 faizi metro, qalan hissəsi isə digər nəqliyyat növləri ilə daşınıb.

Dəmir yolu nəqliyyatı ilə 2018-ci ilin yanvar-aprel ayları ərzində 4,4 milyon ton yük, 828,4 min sərnişin daşınıb, 2017-ci ilin eyni dövrü ilə müqayisədə yük daşınmasında 9,7 faiz azalma, sərnişin daşınmasında isə 3,2 faiz artım müşahidə olunub.

Nəqliyyat sektorunda daşımaların həcmində xüsusi çəkisi olan avtomobil nəqliyyatı ilə 41,5 milyon ton yük, 540,6 milyon sərnişin daşınıb və əvvəlki ilin eyni dövrü ilə müqayisədə müvafiq olaraq 2,5 faiz və 1,4 faiz artım qeydə alınıb. Sərnişinlərin 96,1 faizi avtobus, 3,9 faizi isə minik taksilərinin xidmətlərindən istifadə edib.

Metro nəqliyyatının xidmətlərindən istifadə etmiş sərnişinlərin sayı 2,5 faiz artaraq 77,8 milyon nəfər olub.

Hava nəqliyyatı ilə 648,8 min və ya 6,8 faiz çox sərnişin daşınıb. Bu nəqliyyat növü ilə yükdaşıma 40,5 faiz artaraq 70,4 min tona çatıb.

Avtosfer.az