Azərbaycanlı sürücünün qatilinə bəraət verildi

Moskvanın Zyuzinsk rayon Məhkəməsi Azərbaycan vətəndaşı Samir Qasımovu odlu silahdan atəş açaraq qətlə yetirməkdə təqsirli bilinən Dmitri Alfyorova bəraət verib. Avtosfer.az modern.az-a istinadən xəbər verir ki, məhkəmə cinayət materiallarının dolayı faktlar əsasında tərtib olunduğunu açıqlayıb. Hələ 2016-cı ilin aprelində həbs olunan Alfyorov “Russkie” millətçi hərəkatının üzvü idi və Moskvaya silah gətirən zaman saxlanılmışdı. Ona qarşı Cinayət Məcəlləsinin 2 maddəsi ilə cinayət işi açılmışdı. Sonradan istintaq millətçi gəncin 2011-ci il aprelin 25-də taksi fəaliyyəti ilə məşğul olan Azərbaycan vətəndaşı Samir Qasımovu da qətlə yetirdiyini açıqlamışdı. Belə ki, həmin tarixdə gecə radələrində taksi tutan Alfyorov yolda Samir Qasımovla mübahisə etmiş və Moskvanın Yujnaya Butovo rayonunda onu tapançadan atəşlə qətlə yetirmişdi. 2017-ci ilin sentyabrında “qanunsuz olaraq odlu silah əldə etmə” və “qəsdən adam öldürmə” maddələri ilə ittiham olunan Dmitri Alfyorov 12 il müddətinə azadlıqdan məhrum edilmişdi. Lakin taksi sürücüsünün qətli ilə bağlı bəraət aldığı üçün onun həbs müddəti 6 ilə endirilib.