Bakı Nəqliyyat Agentliyinin əməkdaşları qan verdi - FOTO

Bakı Nəqliyyat Agentliyində qanvermə aksiyası keçirilib. Qanvermə aksiyası Azərbaycan Prezidenti İlham Əliyevin təsdiq etdiyi "Hemofiliya və talassemiyadan əziyyət çəkən uşaqlara qayğı" Dövlət Proqramına uyğun, həmçinin, Heydər Əliyev Fondunun "Talassemiyasız həyat naminə" proqramı çərçivəsində Bakı Nəqliyyat Agentliyi və Mərkəzi Qan Bankınının birgə təşəbbüsü ilə keçirilib. BNA-dan Avtosfer.az-a verilən məlumata görə, aksiyada Bakı Nəqliyyat Agentliyinin rəhbərliyi, Agentliyin Aparatının və tabeli təşkilatlarının əməkdaşları könüllü iştirak edərək, qana ehtiyacı olan insanların köməyinə çatmaq üçün bu nəcib və humanist xarakterli aksiyaya qoşulublar. Məqsəd, hemofiliya və talassemiya xəstəliklərindən əziyyət çəkən insanlara, xüsusən də uşaqlara yardım etmək və onlar üçün tədarük olunan qan ehtiyatını artırmaqdır. Bahadur Eyvazov adına Elmi-Tədqiqat Hemotologiya və Transfiziologiya İnstitutunun Mərkəzi Qan Bankı tərəfindən ezam olunmuş xüsusi tibb briqadasının həkim-hemotoloqları tərəfindən hər bir donorun sağlamlığı öncədən müəyyən olunub. Onlardan qan analizi götürülərək sağlam olub-olmamaları müəyyənləşdirilib. Yığılan qan ehtiyatı yoxlanılaraq talassemiya, hemofiliya və digər qan xəstəliklərindən əziyyət çəkənlər üçün istifadə olunacaq.

Aksiyaya qoşulanlar qan xəstəliklərindən əziyyət çəkən uşaqlar üçün könüllü qan verməyin xeyirxah və savab iş olduğunu vurğulayıblar. Onlar belə aksiyalarda yaxından iştirak etməyin vətəndaşlıq borcu olduğunu bildiriblər.

Emin