Bakı-Tbilisi-Qars dəmir yolu çox böyük uğurlar gətirəcək

Bakı-Tbilisi-Qars dəmir yolu layihəsi çox böyük uğurlar gətirəcək. Avtosfer.az xəbər verir ki, bu fikri Azərtac-a müsahibəsində Argus şirkətinin eksperti, siyasi icmalçı Yevgeni Kriştalyov deyib. O bildirib ki, Azərbaycan, Gürcüstan və Türkiyə öz gücləri və birgə sərmayələri hesabına iri, enerji və nəqliyyat layihələri reallaşdırırlar. Bunlardan biri də Bakı-Tbilisi-Qars dəmir yolu layihəsidir. “Bir zamanlar Azərbaycan tərəfinin təşəbbüsü ilə Bakı-Tbilisi-Ceyhan neft kəməri layihəsi təklifi irəli sürüldü. O zaman hətta bəzi ölkələr və nüfuzlu siyasətçilər bu layihənin əfsanə olduğunu, heç zaman reallaşmayacağını, rentabelli olmayacağını iddia edirdilər. Lakin, Azərbaycan bu layihənin həyata keçirilməsinə nail oldu və bütün dünyaya sübut etdi ki, Bakı-Tbilisi-Ceyhan kəməri çox böyük uğurlu layihədir. Bu layihə Avropanın enerji təhlükəsizliyinə töhfə verməyə başladı və bu gün hamının diqqət mərkəzindədir. İnanıram ki, Bakı-Tbilisi-Qars layihəsi də belə olacaq. Bu layihə Böyük İpək yolunun tərkib hissəsi olmaqla Şərqlə qərbi, Asiya ilə Avropanı birləşdirəcək. Bu layihə xalqlara firavanlıq, bölgəyə sülh və əmin-amanlıq gətirəcək”, - deyə Y.Kriştalyov vurğulayıb.