Bakıda daha bir küçə piyadalaşdırılır; hansı yeniliklər olacaq? - FOTO

Bakıda elə küçələr var ki, təbiətən piyada zonası üçün daha uyğun olsa da, illərdir avtomobil sıxlığına görə insanlardan uzaq qalıb. Bu küçələrdə nəqliyyat vasitələrinin hərəkəti və dayanması piyada rahatlığını tamamilə məhdudlaşdırır.

Avtosfer.az xəbər verir ki, belə küçələrdən biri də yaxın günlərdə tamamilə piyadalaşdırılması nəzərdə tutulan İslam Səfərli küçəsidir. Layihəyə əsasən, bu ərazidə avtomobillərin hərəkəti məhdudlaşdırılacaq, küçə yalnız piyadaların istifadəsinə veriləcək.

Küçənin piyadalaşdırılması həm ekoloji, həm də sosial baxımdan müsbət nəticələr verəcək. Burada gəzinti zonalarının, açıq havada oturacaqların, ictimai-iaşə obyektlərinin və istirahət guşələrinin yaradılması nəzərdə tutulur. Bu, şəhər sakinlərinin və turistlərin mərkəzi küçələrdə daha çox vaxt keçirməsinə imkan yaradacaq.

Qeyd edək ki, son illərdə Bakının mərkəzi hissəsində bir sıra küçə və meydanların piyadalaşdırılması layihəsi həyata keçirilib. Bu prosesin davam etdirilməsi şəhərin ekoloji mühitinə, səkilərdə hərəkət rahatlığına və ümumilikdə paytaxtın turizm potensialına müsbət təsir göstərəcək.

Yaxın günlərdə İslam Səfərli küçəsində piyadaların rahat hərəkəti üçün işlərə başlanacağı gözlənilir.

Eltac Zülfüqaroğlu