Bakıda məktəb yandı - VİDEO

Bakıda məktəbdə yanğın olub. Hadisə zamanı 8 sinif və direktorun otağı yanaraq yararsız hala düşüb. Yanğın səhərin erkən saatlarında baş verdiyindən məktəbdə şagird olmayıb. Avtosfer.az xəbər verir ki, yanğına səbəb elektrik naqillərindəki qısaqapanma olub.

Hadisə səhər saatlarında paytaxtın Qaradağ rayonu Lökbatan qəsəbəsi ərazisindəki, Laçın rayonundan olan məcburi köçkünlər üçün nəzərdə tutulan İmanlar kənd orta məktəbində baş verib.

Yaxınlıqdakı elektrik dirəyindən məktəbə daxil olan naqillərdə külək səbəbindən qığılcım yaranıb. Qəfildən başlayan yanğın tez bir zamanda məktəbin sinif otaqlarına keçib. Hadisə zamanı 8 sinif və direktorun otağı yanaraq yararsız hala düşüb.

Məktəbin direktor müavini Elbrus Nəsibovun sözlərinə görə, hadisə zamanı məktəbdə şagird olmyaıb.

Hadisə yerinə gələn rayon Dövlət Yanğından Mühafizə hissəsinin canlı qüvvəsi və texnikası alovun qarşısını alıb. Hadisə zamanı xəsarət alan və yaralanan olmayıb. 150 kvadratmetrlik məktəbin 102 kvadratmetr hissəsi yanaraq yararsız hala düşüb. Bütün bunlara baxmayaraq, 120 şagirdin tədrisi davam edir.

Təhsil Nazirliyinin mətbuat katibi Cəsarət Valehov bildirib ki, hadisə hazırda müvafiq qurumlar tərəfindən araşdırılır. Araşdırma yekunlaşdıqdan sonra məktəbin təmiri nazirlik tərəfindən həyata keçiriləcək.

Avtosfer.az