Bakıda saxta nömrə ilə "avtoşluq" edən daha iki nəfər həbs edilib -FOTOLAR

Bakıda yol hərəkəti qaydalarını davamlı şəkildə, cəmiyyətə hörmətsizlik nümayiş etdirməklə pozan daha iki sürücü həbs edilib. Bununla bağlı Avtosfer.az-a məlumat verən Bakı Şəhər Dövlət Yol Polisi İdarəsinin bölmə rəisi, polis polkovniki Vaqif Əsədov bildirib ki, həmin şəxslər avtoxuliqanlıq əməlləri ilə yanaşı avtomobilin dövlət qeydiyyat nişanını saxtalaşdıraraq bu hərəkətləri dəfələrlə təkrar ediblər.

Belə ki, Abşeron rayon sakini Nəsib Quliyev 24.07.2018-ci il tarixində, idarə etdiyi "LİP PV 392" nömrə nişanlı, "VAZ 21074" markalı avtomobil ilə Nəsimi və Nərimanov rayonlarında ictimai qaydaları, əhalinin dincliyini  aşkar şəkildə pozaraq avtoxuliqanlıq edib. YPX əməkdaşları tərəfindən saxlanılan zaman onun istifadə etdiyi nomrənin kustar üsulla hazırlandığı və saxta olduğu üzə çıxıb. Avtomobilin həqiqi nömrəsi olan AZ 10 MC 193 dövlət nömrə nişanı isə avtomobilin yük yerindən aşkarlanıb.

Digər bir sürücü, Nərimanov rayon sakini Elvin İbrahimov da eyni tarixdə və eyni rayonların ərazisində idarə etdiyi 99 LN 217 dövlət nömrə nişanlı, "VAZ 21074" markalı avtomobillə "avtoşluq" edib. O da saxlanılan zaman avtomobilin yük yerindən "ELİK 014" saxta qeydiyyat nişanı aşkarlanıb.

Hər iki sürücü barəsində hazırlanmış materiallar Nərimanov rayon 17-ci polis Şöbəsində müvafiq məhkəmələrə təqdim etmək üçün hazırlanır.

Elmin