Bakıda tükürpədici cinayət: Oğlan nişanlısını güllələdi - VİDEO

Bakıda tükürpədici cinayət törədilib. Avtosfer.az xəbər verir ki, oğlan elçi göndərdiyi qızın evinə basqın edərək gələcək həyat yoldaşını öldürüb,qayınanasını isə güllələyib.

Elçilik ağır cinayətlə sona çatıb. Qızı versələr də, oğlan onların evinə silahla basqın edərək, sevdiyi qızı və onun anasını güllələyib.

Dəhşətli cinayət gecə saatlarında paytaxtın Sabunçu rayonu Balaxanı qəsəbəsində baş verib. Məlumata görə, Balaxanı qəsəbə sakini, 19 yaşlı Sabir Qədimovun ailəsi Cəfərovlar ailəsinin qızı 17 yaşlı Aytən Cəfərovaya elçi göndərib.

Qızın bibisi Məlahət Axıyevanın sözlərinə görə, Sabir Qədimov gecə saatlarında babasına məxsus ov tüfəngini götürüb qızın evinə basqın edib. O, tüfənglə fərdi yaşayış evinin həyətində Aytən Cəfərovanın başına və bədəninə atəş açıb. Onun qarşısını almaq istəyən qızınanası, 55 yaşlı Esmira Cəfərova əlindən və çiynindən güllə yarası alıb.

Səsə çıxan qonşular dərhal polisə məlumat veriblər. Sabir Qədimov isə hadisə yerindən qaçaraq gizlənib. Yaralılar 3 saylı Kliniki Tibbi Mərkəzə yerləşdirilib. Aytən Cəfərova başından və döş qəfəsindən xəsarət aldığı üçün onun həyatını həkimlər xilas edə bilməyiblər. Anası Esmira Cəfərova isə dərhal əməliyyat olunub.

Əməliyyatçılar hadisədən sonra qaçıb gizlənən Sabir Qədimovu saxlayıblar. İlkin ifadəsində o, hadisəni aralarında yaranmış münaqişə zəminində törətdiyini deyib.

Faktla bağlı Sabunçu Rayon Prokurorluğunda müvafiq maddələrlə cinayət işi başlanıb, istintaq davam edir.

Avtosfer.az