Bakının simvollarından biri niyə baxımsız qalıb? – Memardan İRAD - FOTO

Memar Elçin Əliyev Bakının simvollarından biri hesab olunan "Alov Qüllələri"ndə müşahidə etdiyi vəziyyətlə bağlı narazılığını ifadə edib.

Avtosfer.az xəbər verir ki, memar bununla bağlı sosial şəbəkə hesabında paylaşım edib.

Elçin Əliyev bildirib ki, söhbət sadəcə bir lövhədən və ya kiçik texniki çatışmazlıqdan getmir. Onun sözlərinə görə, bu cür detallar paytaxtın memarlıq simasına və şəhər haqqında formalaşan təəssürata birbaşa təsir göstərir.

"Bu, sadəcə bir lövhə deyil. Bu, nüfuzlu binanın siması, eyni zamanda şəhərin vizit kartlarından biridir. “Alov Qüllələri”nin vəziyyətinə ümumiyyətlə kim cavabdehdir və niyə bunu heç kim görmür?" – deyə Elçin Əliyev paylaşımında qeyd edib.

Memar hesab edir ki, məsuliyyətsizlik məhz belə kiçik görünən detallardan başlayır. Vaxtında aradan qaldırılmayan xırda çatışmazlıqlar sonradan işə və şəhər mühitinə münasibətin göstəricisinə çevrilir.

Elçin Əliyev aidiyyəti qurumların paytaxtın simvolik tikililərinin vəziyyətinə daha həssas yanaşmasının vacibliyini vurğulayaraq, bu kimi məsələlərin diqqətdən kənarda qalmamasının əhəmiyyətini qeyd edib.

Eltac Zülfüqaroğlu