“BakuBus” avtobusu niyə dayanacaqdan kənarda dayanır? – MMC cavab verdi

Sentyabrın 28-də “BakuBus” sürücüləri “İnşaatçılar” metrostansiyası ətrafındakı dayanacaqda dayanma-durma qaydalarını kobud şəkildə pozub və digər hərəkət iştirakçılarına maneə olublar. Bununla bağlı Avtosfer.az-da yayılan videoya “BakuBus” MMC reaksiya verib. Şirkətdən bildirilib ki, “BakuBus” MMC-yə məxsus avtobusları idarə edən sürücülər daim dayanma-durma qaydalarına ciddi şəkildə əməl edir. Lakin bəzən dayanacaqlarda digər nəqliyyat vasitələrinin, xüsusilə də taksi fəaliyyəti ilə məşğul olan avtomobillərin dayanması səbəbindən sürücülər avtobusları təyin edilmiş yerlərdə saxlamaqda çətinlik çəkirlər.  
“İnşaatçılar” metrostansiyasının qarşısında çəkilmiş görüntüdən də aydın şəkildə müşahidə edilir ki, digər nəqliyyat vasitələri saxlanıldığı üçün “BakuBus” MMC-yə məxsus avtobus dayanacağa daxil ola bilmir. 
“BakuBus” MMC KİV nümayəndələrindən hadisələrə obyektiv yanaşmağı, birtərəfli məlumatlar yaymamağı, həmçinin, məlumatı dərc etməzdən əvvəl “BakuBus” MMC-yə müraciət olunmasını xahiş edir.
 

Emin