Beyləqanda 200-ə yaxın ağac yandırıldı: Təbiətə 40 min manat ziyan vurulub - VİDEO

Beyləqanda, yol kənarında kol-kos yandırılıb, içində xeyli ağac yanaraq məhv olub. Avtosfer.az-ın məlumatına görə, hadisə təxminən 25 gün əvvəl Beyləqan rayonunun Dünyamalılar kəndi ərazisində baş verib. Avtomobil yolunun kənarındakı yaşıllıq sahəsində ağacların yanması ilə bağlı daxil olan müraciət 9 saylı Regional Ekologiya və Təbii Sərvətlər İdarəsinin əməkdaşları tərəfindən araşdırılıb. Əraziyə keçirilən baxış zamanı məlum olub ki, yol kənarı yaşıllıq sahəsində yaş köküstə müxtəlif cinsli və diametrli 196 ədəd ağac yanıb. Faktla bağlı akt tərtib edilib və təbiətə 39 200 manat məbləğində ziyan dəydiyi müəyyən olunub. Təqsirkarların tapılması və barələrində qanuna müvafiq tədbirlərin görülməsi üçün toplanmış sənədlər Beyləqan rayon polis şöbəsinə göndərilib.