Bolt 2035-ci ilə qədər platformasında 100 min avtonom avtomobil hədəfi ilə PAVE Europe-a qoşulur

Avropanın aparıcı mobillik platforması olan Bolt, avtomatlaşdırılmış nəqliyyat vasitələri (AV) texnologiyaları barədə ictimaiyyət və siyasətçilər arasında anlayışı artırmağı hədəfləyən Partners for Automated Vehicle Education (PAVE) Europe təşkilatına qoşulduğunu elan edib.

Bu addım Bolt-un ötən il avtonom idarəetmə sahəsində Pony.ai və Stellantis ilə imzaladığı ilk tərəfdaşlıqlardan sonra atılıb. Sözügedən əməkdaşlıqlar Bolt-un avtonom mobilliyə yanaşmasının əsasını təşkil edir – aparıcı texnologiya və avtomobil istehsalçıları ilə əməkdaşlıq edərək Avropa bazarına uyğun həllər yaratmaq.

Bolt-un uzunmüddətli məqsədi 2035-ci ilə qədər platformasında 100,000 avtonom avtomobilin fəaliyyət göstərməsini təmin etməkdir. Şirkət bu hədəfə çatmaq üçün avtonom nəqliyyat ekosistemində yeni tərəfdaşlıqlar qurmağa davam edir və Avropa üçün uyğunlaşdırılmış, tam inteqrasiya olunmuş həllər üzərində çalışır.

2013-cü ildə Estoniyada yaradılan Bolt milyonlarla istifadəçi və nəqliyyat vasitəsini birləşdirən geniş mobillik şəbəkəsinə malikdir. PAVE Europe-a üzvlük Bolt-a avtonom nəqliyyatın təhlükəsiz və məsuliyyətli tətbiqi ilə bağlı məlumatlara əsaslanan müzakirələrə töhfə vermək imkanı yaradır.

Bolt-un Avtonom İdarəetmə üzrə Prezidenti Yevgeni Kabanov bildirib:

“Avtonom nəqliyyat vasitələri şəhərlərdə hərəkət tərzini köklü şəkildə dəyişəcək. Avropada uğurlu tətbiq üçün ictimai etimad, aydın qaydalar və şəhərlərin real iş prinsiplərini anlayan operatorlar vacibdir. PAVE Europe bu dialoq üçün mühüm platformadır və təcrübəmizi bölüşməkdən məmnunuq.”

PAVE Europe-un İcraçı Direktoru Guido Di Pasquale isə qeyd edib:

“Bolt-un PAVE Europe-a qoşulması maarifləndirmənin nə qədər vacib olduğunu göstərir. Birgə əməkdaşlıqla avtonom mobillik həllərinin daha təhlükəsiz, dayanıqlı və səmərəli nəqliyyat sistemlərinə töhfə verməsini hədəfləyirik.”