Çin maşınlarının ehtiyat hissəsi kimi satışa çıxarılması adiləşir - VİDEO

Sosial şəbəkələrdə fəaliyyət göstərən elan səhifələrində Çin istehsalı olan daha bir avtomobilin ehtiyat hissəsi kimi satışa çıxarıldığına dair görüntülər yayılıb. Bu cür elanlar artıq nadir hal sayılmır və getdikcə adi mənzərəyə çevrilir.

Avtosfer.az xəbər verir ki, fərdi şəxslər tərəfindən ölkəyə gətirilən bir çox avtomobil rəsmi diler və servis şəbəkəsindən kənarda qalır. Nəticədə bu nəqliyyat vasitələri istehsalçı və ya rəsmi nümayəndəlik tərəfindən texniki xidmətlə təmin edilmir. Bu isə istismar zamanı ciddi problemlərə yol açır.

Yanacaq qiymətlərinin artması avtomobil seçimini dəyişməlidirmi? – Ekspertdən AÇIQLAMA

Ən böyük çətinlik isə ehtiyat hissələrinin tapılması ilə bağlıdır. Rəsmi kanallar olmadığı üçün sahiblər ya qeyri-rəsmi bazara üz tutur, ya da avtomobili hissə-hissə satışa çıxarmağa məcbur qalırlar. Sosial şəbəkələrdə “ehtiyat hissəsi üçün satılır” başlığı ilə yayımlanan bu elanlar da məhz həmin problemin nəticəsi kimi qiymətləndirilir.

Mütəxəssislər bildirirlər ki, bu tendensiya həm sürücülər üçün maliyyə riski yaradır, həm də yol hərəkəti təhlükəsizliyi baxımından suallar doğurur. Rəsmi servis dəstəyi və ehtiyat hissəsi təminatı olmayan avtomobillərin uzunmüddətli istismarı riskli hesab olunur.

Qeyd edək ki, son illər ölkəyə fərdi qaydada gətirilən, lakin rəsmi nümayəndəliyi olmayan avtomobillərin sayı artmaqdadır. Bu isə avtomobil bazarında yeni, amma hələ də tam tənzimlənməyən problemlər yaradır.

Eltac Zülfüqaroğlu