Çindən sonra daha bir ölkə elektron qapı tutacaqlarını məhdudlaşdırır – RƏSMİ

Qəza zamanı elektrik enerjisinin kəsilməsi səbəbindən avtomobildə qalan sərnişinlərin qapıları aça bilməməsi halları artdığından, ABŞ elektron qapı tutacaqları ilə bağlı yeni təhlükəsizlik standartlarının hazırlanmasına başlayıb.

Avtosfer.az xəbər verir ki, ABŞ Milli Avtomobil Yollarında Hərəkətin Təhlükəsizliyi Administrasiyası (NHTSA) qəza və texniki nasazlıq zamanı avtomobildən təhlükəsiz çıxışı təmin edəcək mexanizmlərin məcburi tətbiqi ilə bağlı hüquqi prosedura start verib.

Qurumun planına əsasən, son illər bir çox yeni avtomobildə istifadə olunan gizli və elektron qapı tutacaqlarının yerini daha əlçatan və mexaniki ehtiyat açma sistemləri tutmalıdır. Məqsəd qəza zamanı elektrik sisteminin sıradan çıxması halında sərnişinlərin avtomobildən rahat şəkildə çıxa bilməsini təmin etməkdir.

Mütəxəssislər bildirirlər ki, estetik görünüş və aerodinamikanı yaxşılaşdırmaq məqsədilə tətbiq edilən elektron qapı tutacaqları bəzi qəzalarda ciddi təhlükəsizlik riski yarada bilir. Elektrik kəsildikdə qapıların açılmaması və mexaniki ehtiyat açma qollarının gizli yerlərdə yerləşməsi sərnişinlərin vaxtında avtomobili tərk etməsini çətinləşdirir.

Qeyd edək ki, bu istiqamətdə ilk addımı Çin atıb. Ölkədə fövqəladə hallarda avtomobildən çıxışı çətinləşdirən bəzi elektron qapı tutacağı sistemlərinin istifadəsinə məhdudiyyət tətbiq olunub.

NHTSA hazırda avtomobil istehsalçılarından texniki məlumatlar və təhlükəsizlik analizləri toplayır. İctimai müzakirələr başa çatdıqdan sonra ABŞ-də istehsal ediləcək yeni avtomobillər üçün məcburi təhlükəsizlik standartlarının təsdiqlənməsi gözlənilir.

Eltac Zülfüqaroğlu