Dekabrın 6 günü gecələr çox uzun - 14 saat 43 dəqiqə, gündüzlər qısa olacaq...

Azərbaycana qış fəsli daxil olduqdan sonrakı 6 gün ərzində ən qısa gündüzlər və ən uzun gecələr müşahidə ediləcək. Avtosfer.az xəbər verir ki, bunu Trend-ə AMEA-nın Şamaxı Astrofizika Rəsədxanasının elmi işlər üzrə direktor müavini, fizika üzrə fəlsəfə doktoru Xıdır Mikayılov deyib. Onun sözlərinə görə, Azərbaycana qış fəsli dekabrın 22-də saat 02.22.42-də daxil olacaq: "Dekabrın 21-dən 22-ə keçən gecə Azərbaycanda ən uzun gecə, dekabrın 22-i də isə ən qısa gündüz olacaq. Həmin vaxtdan başlayaraq, 6 gün ərzində - dekabrın 21-dən 27-dək ölkə ərazisində gecələrin uzunluğu bərabər olacaq, eləcə də o günlərdə gündüzlərin uzunluğu bərabər olacaq. Həmin müddətdə gecələrin uzunluğu 14 saat 43 dəqiqə, gündüzlərin uzunluğu 9 saat 17 dəqiqə olacaq".

Direktor müavini əlavə edib ki, Yer Qış Günəş duruşundan keçdikdən sonra günlər uzanacaq, gecələr qısalacaq: “Amma biz dekabrın 26-dək gündüzün uzanmasını hiss etməyəcəyik. Ancaq 1 həftədən sonra - hər 2-3 gündən bir gecələrin 1 dəqiqə qısaldığını müşahidə edəcəyik”. X.Mikayılov qeyd edib ki, Yerin Günəşə ən yaxın məsafəsi yanvarın 3-də (2019-cu il) olacaq. Həmin gündə Bakı vaxtı ilə saat 09:36-da Yerlə Günəş arasındakı məsafə 147 098 291 km olacaq ki, bu da Yerlə Günəş arasında olan orta məsafədən (149 600 000 km) təxminən 2,5 million km azdır.