Dəmiryolçuların etiraz tətili 400 km-lik tıxaca səbəb olub

Fransalı dəmiryolçuların etiraz tətilinin ikinci günü nəticəsində bu gün Paris ətrafında 400 kilometrdən çox tıxac meydana gəlib. "Report" TASS-a istinadən xəbər verir ki, bu barədə BFM telekanalı məlumat yayıb. Fransa Dəmir Yolları dövlət şirkətinin (SNCF) məlumatına görə, etiraz aksiyasında çərşənbə günü dəmiryol işçilərinin 34%-i iştirak edir. Həmkarlar ittifaqları şirkət rəhbərlərinin məlumatları manipulyasiya edərək 80%-lik iştirak səviyyəsi barədə məlumat verdiyini açıqlayıb. SNCF rəhbərliyi KİV-in dolu perronlar və qatarların şəklini çəkməsinə mane olmaq üçün bu gün jurnalistlərin onun obyektlərinə daxil olmasına qadağa qoyub. Qatarların əksəriyyəti təxminən, bir saatlıq gecikmə ilə gəlir.