“Elmlər Akademiyası” metrosunun qarşısında ekspres avtobuslar üçün dayanacaq ərazisi genişləndirildi – FOTO

“Bakı Metropoliteni”nin “Elmlər Akademiyası” stansiyasının qarşısında ekspres avtobuslardan istifadə edən sərnişinlərin rahat və təhlükəsiz şəkildə avtobuslara minib-düşməsinin təmin edilməsi məqsədilə dayanacaq ərazisi genişləndirilib.

Avtosfer.az xəbər verir ki, metro xətlərinin ayrılması ilə əlaqədar təşkil edilən ekspres avtobusların dayanacaq hissəsində sərnişinlərin minib-düşməsi zamanı yaranan narahatlığın aradan qaldırılması üçün ərazidə müvafiq abadlıq işləri aparılıb.

AYNA və Yasamal Rayon İcra Hakimiyyətinin təşkilatçılığı ilə ekspres avtobusların dayanacaq hissəsində mövcud torpaq sahə daşla döşənib. Bununla da sərnişinlərin avtobuslara daha rahat və maneəsiz minib-düşməsi, eləcə də ərazidə hərəkət şəraitinin yaxşılaşdırılması təmin olunub.

Qeyd edək ki, ekspres avtobuslar metro xətlərinin ayrılması ilə əlaqədar sərnişin daşımalarının fasiləsizliyinin təmin edilməsi məqsədilə təşkil edilib.

Eltac