“Gediş haqqının qaldırılmasına deyil, aşağı salınmasına çalışılmalıdır”

Sosial şəbəkələrin Azərbaycan seqmentində və bəzi KİV-lərdə paytaxtın ictimai nəqliyyatında gediş haqqının iki dəfə artacağı barədə qeyri-rəsmi xəbərlər yayılmaqdadır.

Bu xəbərlərə siyasi ekspert Məhəmməd Əsədullazadə də reaksiya verib.

M.Əsədullazadə deyib:

“Bakının bərbad ictimai nəqliyyatından istifadə üçün qabaqcadan pul almaq planı müzakirə edilir.

Azərbaycanda ictimai nəqliyyat pensiyaçılara, tələbələrə, müəllimlərə, əlillərə və müharibə veteranlarına pulsuz olmalıdır. Bayram günlərində və digər xüsusi günlərdə ictimai nəqliyyat pulsuz xidmət göstərməli, xərci dövlət qarşılamalıdır. Hələ də ictimai nəqliyyat bərbaddır. Baxmayaraq ki, yeni müasir sərnişin avtobusları gətirilib. Amma düzgün idarəetmə olmadığı üçün bu sistem özünü doğrultmur. İctimai nəqliyyatda gediş haqqının qaldırılmasına deyil, aşağı salınmasına çalışılmalıdır.

Xalqın sosial rifahının yaxşılaşdırılması istiqamətində mühüm işlər görülməlidir. Amma yenidən gediş haqqının qaldırılması ilə bağlı müzakirələr başlanıb. Əvvəlcədən ödəniş sisteminə keçmək isə bir növ o deməkdir ki, qabaqcadan pulu al, avtobusu xəttə buraxma”.(Medianews.az)