Günlərdir dolub-daşan zibil qutuları daşınmır - VİDEO

Bir həftədən artıqdır Binəqədi rayonu Biləcəri qəsəbəsində yerləşən yaşayış massivində zibil qutuları daşınmır. Həmin ərazidə yaşayan sakinlər belə iddia edirlər. Havalar isti keçdiyindən yaranan üfunət isə onların evlərinə vurur.

Avtosfer.Az xəbər verir ki, günlərdir dolub-daşan zibil qutuları daşınmır. Üstəlik, bu qutuların yaşayış evlərinin bir addımlığında olması vəziyyəti daha da qəlizləşdirir.

Bura Binəqədi rayonu Biləcəri qəsəbəsi Yeni yaşayış massividir. Bu ərazidə yaşayan sakinlər zibil qutularının bir həfətədən çoxdur ki, daşınmamasından şikayətçidirlər. Onlar iddia edirlər ki, havalar isti keçdiyindən ətrafa yayılan üfunətdən həyətlərinə belə çıxa bilmirlər.

Zibillər yığışdırılıb aparılmadığından əraziyə itlər toplaşır. Bu da sakinlər üçün təhlükə yaradır.

Sakinlərin sözlərinə görə, hər ay vaxtı-vaxtında zibil pulu ödəmələrinə baxmayaraq, zibil vaxtında daşınmır. Üstəlik, Biləcəri bələdiyyəsinə şikayət etsələr də, heç bir tədbir görülmür. Adı hallandırılan bələdiyyədən mövqe öyrənmək isə mümkün olmadı. Görünür, problem hələ bir müddət də davam edəcək. Bundan da əziyyət çəkənlər isə sakinlər olacaq.