İki nəfəri bıçaqlayan gənc məhkəmədə ifadə verib

Bu gün Bakı Ağır Cinayətlər Məhkəməsində qəsdən sağlamlığa ağır zərər vurmaqda təqsirləndirilən Müzəffər Sərxanbəyovun cinayət işi üzrə məhkəmə iclası davam etdirilib. Avtosfer.az-ın "Report"a istinadən xəbərinə görə, hakim Zeynal Ağayevin sədrliyi ilə keçirilən prosesdə dövlət ittihamçısı ittiham aktını elan edib. Elan olunmuş ittiham üzrə M.Sərxanbəyov özünü qismən təqsirli bilib. O, sərbəst ifadəsində hadisəni xuliqanlıq zəminində törətmədiyini söyləyib: "Əvvəl onlar məni vurdu. Buna görə mən də bıçağa əl atdım". Məhkəmənin baxış iclası oktyabrın 12-nə təyin edilib. Qeyd edək ki, M.Sərxanbəyov Cinayət Məcəlləsinin 126.1-ci (qəsdən sağlamlığa ağır zərər vurma) 126.2.2 və 126.2.4-cü maddələri ilə təqsirli bilinir. O, bu ilin may ayında Bakının Bülbül prospektində yerləşən gecə klublarından birində əyləndikdən sonra tanımadığı şəxslərlə mübahisə edib. Mübahisə gecə klubundan çöldə davam edərkən M.Sərxanbəyov əlini bıçağa atıb. Daha sonra o, mübahisə etdiyi iki şəxsə bıçaqla xəsarət yetirib. Xuliqanlıq niyyəti ilə qəsdən sağlamlığa ağır zərər vurmaqda ittiham edilən M.Sərxanbəyov hadisənin söyüş üstündə olduğunu, tanımadığı şəxslərin onun ünvanına nalayiq ifadələr işlətdiyini deyir. Məhkəmənin hazırlıq iclasında dövlət ittihamçısı M.Sərxanbəyovun barəsində olan polis nəzarətinə verilmə qətimkan tədbirinin dəyişdirilməsini və məhkəmə zalından həbs edilməsini istəyib. Məhkəmə vəsatəti təmin edib. O, məhkəmə zalında həbs olunub.