İllərdir istifadə etdikləri qarajları əllərindən alındı - VİDEO

75 ailənin yaşadığı binanın zirzəmisinin qanunsuz olaraq zəbt olunduğu iddia edilir. Avtosfer.az xəbər verir ki, görüntülər paytaxtın Murtuza Nağıyev küçəsində yerləşən çoxmərtəbəli binadandır. Burada yaşayan sakinlər deyir ki, 2 ildir ki, binanın zirzəmisi tanımadıqları şəxslər tərəfindən özəlləşdirilib.  Sakinlər illərdir yaşadıqları binada indi maşınlarını saxlamağa yer tapmadıqlarını deyirlər. Məlum oldu ki, sözügedən bina "Atlant-İnşaat" MMC-nin balansındadır. Bakı Şəhər İcra Hakimiyyəti tərəfindən MMC-yə müvafiq qaydada istismara icazə sənədi verilib. Bu sənədləşmənin əsasında 2016-cı il tarixində binanın bütün yaşayış, qeyri-yaşayış və qaraj sahələrinə "Atlant-İnşaat" MMC tərəfindən mülkiyyət əsaslı çıxarış alınıb. Daha sonra binanın bütün yaşayış və qeyri-yaşayış sahələri, o cümlədən qarajlar notarial qaydada müxtəlif fiziki şəxslərə satılıb. O da bildirildi ki, hal-hazırda «Atlant-İnşaat» MMC-nin sözügedən binada hər hansı mülkiyyət hüququ yoxdur. 2023-cü ildən binanın idarə edilməsi bina sakinləri tərəfindən həyata keçirilməkdədir.