İranla müharibəyə görə ABŞ-nin daxili siyasəti dəyişə bilər - POLİTOLOQ

ABŞ-nin Yaxın Şərqdə həyata keçirdiyi hərbi əməliyyatların nəticələri regionda ciddi siyasi dəyişikliklərə səbəb olub. 

Avtosfer.az xəbər verir ki, bu barədə politoloq Zeynal Əmrəliyev açıqlama verib.

Onun sözlərinə görə, baş verən proseslər nəticəsində İran daxilində hərbi və siyasi elitanın mühüm hissəsi sıradan çıxarılıb. Xüsusilə SEPAH ilə münasibətləri gərgin olan şəxslərin hədəf alındığı qeyd olunur.

Politoloq qeyd edir ki, ölkənin ali rəhbəri Əli Xamenei vəfat edib və onun yerinə oğlu gətirilib. Regionda baş verən dəyişikliklər çərçivəsində Hörmüz boğazı üzərində nəzarət və iqtisadi dividentlərlə bağlı yeni balans formalaşıb. Bəzi ölkələr, o cümlədən Oman bu proseslərdən müəyyən iqtisadi faydalar əldə edə bilər.

Politoloq hesab edir ki, hazırkı mərhələdə ABŞ bu münaqişədən ciddi strateji qazanc əldə etməyib. Əksinə, Vaşinqton regionda, xüsusilə Körfəz ölkələri ilə münasibətlərdə müəyyən nüfuz itkisi ilə üzləşib. Bu fonda Çinin mövqelərinin gücləndiyi və yaxın illərdə Körfəz ölkələri üçün əsas tərəfdaşlardan birinə çevrilə biləcəyi ehtimal olunur.

Zeynal Əmrəliyev əlavə edib ki, baş verən hadisələr ABŞ Demokratlar Partiyası daxilində də siyasi proseslərə təsir göstərə bilər. Onun fikrincə, gələcək seçkilərdə ABŞ-də daxili siyasi balansın dəyişməsi ehtimalı var.

Politoloq sonda vurğulayıb ki, bu münaqişənin nəticələri hələ tam formalaşmayıb və gələcəkdə regionda yeni geosiyasi reallıqların yaranması mümkündür. Onun sözlərinə görə, baş verənlər ABŞ-nin son onilliklərdə iştirak etdiyi ən mübahisəli hərbi proseslərdən biri kimi qiymətləndirilir.

Eltac Zülfüqaroğlu