Maşın qaçıran şəxs saxlanıldı - Zərdabda

Zərdab rayon sakini Tərlan İsayevin “İJ-27175” markalı maşını qaçırılıb. Avtosfer.az Daxili İşlər Nazirliyinin mətbuat xidmətinə istinadən xəbər verir ki, bu barədə şəxs Rayon Polis Şöbəsinə məlumat verib. Müraciətlə əlaqədar Zərdab RPŞ-də dərhal əməliyyat qrupu yaradılıb. “İsti izlərlə” və peşəkarlıqla həyata keçirilmiş əməliyyat-axtarış tədbirləri nəticəsində rayon sakini Anar Əhmədov qaçırdığı avtomobillə birlikdə saxlanılaraq istintaqa təhvil verilib. Dindirilmə zamanı A. Əhmədov törətdiyi cinayət əməlini etiraf edib. Qaçırılmış avtomobil maddi sübut kimi götürülüb. Faktla bağlı Zərdab RPŞ-nin istintaq bölməsində cinayət işi başlanılıb, araşdırmalar davam etdirilir.