Maşındakı bu funksiyanı qışda aktivləşdirməyin, görmənizə təsir edir - ARAŞDIRMA

Mütəxəssislər qış aylarında avtomobillərdə ventilyasiya və iqlim nəzarəti parametrlərinin düzgün seçilməsinin sürücülük rahatlığı və yol təhlükəsizliyi baxımından həlledici rol oynadığını bildiriblər. 

Avtosfer.az xəbər verir ki, xüsusilə şaxtalı havalarda pəncərələrdə yaranan dumanlanmanın vaxtında aradan qaldırılmaması qəza riskini əhəmiyyətli dərəcədə artırır.
Qeyd olunur ki, yay aylarında avtomobil salonunu daha tez soyutmaq üçün istifadə edilən “hava sirkulyasiyası” düyməsi qış mövsümündə əks təsir göstərir.

Mütəxəssislərin fikrincə, bu funksiyanın aktiv qalması salon daxilində rütubətin artmasına səbəb olur və sürücünün görünüş məsafəsini məhdudlaşdırır.

Araşdırmalar göstərir ki, avtomobilin içərisində artan rütubət ön şüşədə duman təbəqəsinin əmələ gəlməsinə gətirib çıxarır. Qarın əriməsi, islanmış geyimlər və sərnişinlərin nəfəsi ilə yüksələn rütubət soyuq çöl havası ilə təmasda olduqda şüşə səthində kondensasiya yaradır. Bu halda ventilyasiya sistemində səhv rejimin seçilməsi pəncərələrin daha sürətli və daha qalıcı şəkildə dumanlanmasına səbəb ola bilər.

Bildirilib ki, adətən dairəvi ox işarəsi ilə göstərilən “daxili hava dövranı” düyməsi xarici hava axınını kəsir və avtomobil salonundakı havanı qapalı dövrədə saxlayır. Bu funksiya yay aylarında kondisionerin effektivliyini artırsa da, qış mövsümündə rütubətli havanın salon daxilində qalmasına şərait yaradır. Nəticədə qızdırıcının verdiyi istilik rütubətlə birləşərək pəncərələrdə sürətli dumanlanma yaradır.

Mütəxəssislər diqqətə çatdırıblar ki, daxili hava dövranının uzun müddət açıq qalması avtomobil salonunda karbon qazının səviyyəsinin artmasına da səbəb ola bilər. Bu vəziyyət sürücüdə yuxululuq, diqqətin zəifləməsi və baş ağrısı kimi hallar yarada bilər. Görünüşün azalması və şüşələrin “süd kimi ağ” görüntü alması isə yol-nəqliyyat hadisəsi riskini ciddi şəkildə yüksəldir.

Qış şəraitində avtomobil idarə edərkən pəncərələrin təmiz və aydın qalması üçün çöldən təmiz havanın daxil olmasının vacibliyi vurğulanıb. Mütəxəssislər bildiriblər ki, quru çöl havası iqlim nəzarəti sisteminin şüşələrdəki dumanı aradan qaldırması üçün ən effektiv başlanğıc nöqtəsidir.

Qeyd olunub ki, müasir avtomobillərdə ön şüşənin ərimə rejimi aktivləşdirildikdə sistem avtomatik olaraq daxili hava dövranını bağlayır və kondisioner kompressorunu işə salır. Bu isə təsadüfi deyil. Belə ki, kondisioner yalnız soyutma üçün deyil, həm də havanı qurudaraq rütubəti azaltmaq üçün nəzərdə tutulub.

Mütəxəssislərin sözlərinə görə, kondisionerin qızdırıcı ilə birlikdə işlədilməsi havanı isidərkən eyni zamanda nəmi çəkir və pəncərələrin daha tez təmizlənməsinə kömək edir. Sonda vurğulanıb ki, təhlükəsiz sürücülük üçün pəncərələrdəki duman tamamilə aradan qalxmadan yola çıxmaq olmaz və ventilyasiya sistemi daim “xarici hava” rejimində saxlanılmalıdır.

Eltac Zülfüqaroğlu