Məqsəd Orta Dəhlizi Şərq və Qərb arasında nəqliyyat körpüsünə çevirməkdir - Tokayev

Türk Dövlətləri Təşkilatının (TDT) strateji məqsədi Orta Dəhlizi Şərq və Qərb arasında nəqliyyat körpüsünə çevirməkdir. Avtosfer.az-ın “Report”a istinadən məlumatına görə, bunu ölkənin Prezidenti Kasım-Jomart Tokayev mayın 21-də Macarıstanın paytaxtı Budapeştdə keçirilən Türk Dövlətləri Təşkilatının Dövlət Başçıları Şurasının qeyri-rəsmi Zirvə görüşündə bildirib.

Qazaxıstan Prezidenti, tarif siyasətindəki dəyişikliklər ilə əlaqədar ciddi transformasiya yaşayan qlobal ticarətdəki vəziyyəti xatırladıb.

K.Tokayevin fikrincə, bu cür hallar həm çağırışlar, həm də yeni imkanlar yaradır. O, çətinliklərin öhdəsindən gəlmək üçün sənaye, nəqliyyat və logistika, kənd təsərrüfatı və rəqəmsallaşma kimi əsas sektorlarda səyləri birləşdirməyi təklif edib.

Qazaxıstan Prezidenti həmçinin Türk Dövlətləri Təşkilatına üzv ölkələri "Şimal-Cənub" istiqaməti də daxil olmaqla, iri infrastruktur layihələrinin birgə həyata keçirilməsinə çağırıb. Bu da türk regionunun əsas tranzit mərkəzi kimi mövqeyini əhəmiyyətli dərəcədə gücləndirməyə imkan verəcək.