Məqsəd şəhərin mərkəzində avtomobil yükünü azaltmaqdır – Ekspert

Xəbər verildiyi kimi, Bakının mərkəzinə giriş ödənişli olacaq. Bu, Prezident İlham Əliyevin imzaladığı "Avtomobil nəqliyyatı ilə müntəzəm sərnişin daşınması sahəsinin təkmilləşdirilməsi ilə bağlı bəzi tədbirlər haqqında" Fərmanda öz əksini tapıb. Fərmana əsasən, Nazirlər Kabineti üç ay müddətində paytaxtın inzibati ərazisində ödənişli hərəkət zonalarının yaradılması və bu zonalara daxil olmağa görə ödənişin məbləği ilə bağlı təkliflərini hazırlayıb Prezidentə təqdim etməlidir. Qanunvericilikdə nəzərdə tutulur ki, ödənişli zonalara daxilolma haqqı "İctimai nəqliyyat" Məqsədli Büdcə Fondunun maliyyələşmə mənbələrindən biri olacaq.

Mövzuya münasibət bildirən nəqliyyat məsələləri üzrə ekspert Yasin Mustafayev deyib ki, burada əsas məqsəd odur ki, işi olmayan və alternativ marşrutlardan istifadə edə biləcək sürücülər mərkəzi zonalara daxil olmasın. Nəticədə də orada yaşayan və işləyən insanların hərəkəti rahatlaşsın. Bu yollardakı daimi sıxlığın qarşısı alınsın:

”Məqsəd həmin ərazilərə giriş-çıxışların sayını məhdudlaşdırmaq. Bu yolla da həmin ərazilərdə müşahidə olunan tıxacları aradan qaldırmaqdır. Başlıca məqsəd şəhər mərkəzinin avtomobil yükünü azaltmaqdır”.(525.az)