Milyarder siyasətçi rüsvay oldu: əxlaqsızlıqda suçlanır - FOTO

Britaniya Lordlar Palatasının üzvü, Arcadia Group holdinqinin sahibi, 66 yaşlı milyarder ser Filip Qrin əxlaqsızlıqda və seksual qısnamalarda suçlanıb. Avtosfer.az milli.az-a istinadən bildirir ki, əməkdaşı olan bir neçə qadına təcavüz etmiş milyarder sonradan həmin qadınlara susmaları və məhkəmələrə şikayət etməmələri üçün böyük məbləğdə pullar ödəyib. Arcadia Group holdinqinə Topshop, Topman, Wallis, Evans, Miss Selfridge və Dorothy Perkins brendləri daxildir. Qalmaqal F.Qrinin təcavüzünə məruz qalmış 5 qadının Britaniya parlamentinin yuxarı palatası olan Lordlar Palatasının üzvü ser Piter Qeynə müraciət etmələrindən sonra başlanıb.

Filip Qrin məşhur model və dizayner Xloya Qrinin atasıdır. Hazırda ABŞ-ın Arizona ştatındakı Tuskon şəhərində, 3 milyon dollarlıq rançosunda olan milyarder jurnalistlərin suallarını cavablamayıb. Qrinin mühafizə xidməti media mənsublarını qovub. Milyarderin arvadı Tina Qrin isə heç nə olmamış kimi qızı Xloyanın hazırda qeyri-rəsmi nikahda olduğu Ceremi Mikslə toyuna hazırlıq görür. Fransız Polineziyasında olacaq toya 4 milyon dollar xərcləmək nəzərdə tutulur. Amerikalı Ceremi Miks "dünyanın ən cazibədar məhbusu" kimi sosial şəbəkələrdə məşhurlaşmışdı.