Nəqliyyat vasitələrinin daşınmasında yeni sistem tətbiq olunacaq

Çinin elektrik avtomobil istehsalçısı “Leapmotor” Braziliya bazarına nəqliyyat vasitələrinin çatdırılması üçün yeni logistik həll tətbiq etməyə başlayıb. Şirkət ənənəvi “Ro-Ro” (Roll-on/Roll-off) daşınma modelinə alternativ olaraq “flat rack” (düz dayaq) sistemi ilə daşımaları həyata keçirir.

Avtosfer.az xəbər verir ki, “Leapmotor”dan verilən məlumata görə, yeni yanaşma nəqliyyat vasitələrinin təchizat prosesini sürətləndirmək, logistika əməliyyatlarında çevikliyi artırmaq və müxtəlif növ yük gəmilərindən istifadə imkanlarını genişləndirmək məqsədi daşıyır.

Şirkət Braziliyadakı əməliyyatlar çərçivəsində nəqliyyat vasitələrinin yoxlanılması və paylanması üçün Stellantis qrupunun Rio-de-Janeyro və Minas-Jerais şəhərlərində yerləşən logistika mərkəzlərindən istifadə edir.

Yeni sistem çərçivəsində avtomobillər ənənəvi “Ro-Ro” gəmilərində olduğu kimi öz mühərrikləri vasitəsilə gəmiyə daxil edilmir. Bunun əvəzinə hər bir nəqliyyat vasitəsi xüsusi metal konstruksiyalara bərkidilir və konteyner terminallarında istifadə olunan kranlar vasitəsilə gəmiyə yüklənərək boşaldılır.

“Leapmotor” artıq Rio-de-Janeyro şəhərində yerləşən İtaquai limanı üzərindən bu üsulla avtomobil idxalına başlayıb. Sepetiba Tecon terminalında həyata keçirilən ilk əməliyyat zamanı təxminən 270 metal konstruksiya üzərində yerləşdirilmiş 700-dən çox avtomobil boşaldılıb. Məlumata görə, terminal bu günədək “Leapmotor” markasına məxsus 1800-dən artıq nəqliyyat vasitəsini qəbul edib.

Mütəxəssislərin fikrincə, yeni daşınma modeli avtomobillərin gəmi daxilində idarə olunması zərurətini aradan qaldırır, eyni zamanda yalnız “Ro-Ro” tipli gəmilərdən asılılığı azaldır. Bu isə istehsalçılara yükləmə və çatdırılma proseslərinin planlaşdırılmasında daha böyük çeviklik qazandırır.

“Leapmotor” hesab edir ki, “flat rack” və “Ro-Ro” sistemlərinin birgə tətbiqi beynəlxalq avtomobil logistikasında səmərəliliyin artırılmasına və təchizat zəncirinin daha dayanıqlı qurulmasına imkan verəcək.

Eltac Zülfüqaroğlu