Piyadalar ən çox gecə saatları vurulur...

Son vaxtlar respublikamızda , xüsusilə də, Bakıda  piyadavurma halları çoxalıb. Bəs buna görəsən , səbəb nədir? Təbii ki, bu suala birmənalı cavab vermək çətindir. Ən azından ona görə ki, bu hadisələrin  baş verməsinin  bir yox , bir çox səbəbləri var.

Biz bu sualımızı Bakı Şəhəri Dövlət Yol Polisi İdarəsinin ictimaiyyətlə əlaqələr bölməsinin rəisi, polis mayoru Toğrul Nəsirliyə ünvanladıq. Cənab rəis dedi ki, Bakı şəhərində  piyadavurma hallarının artması öncə bizi, yol polisi əməkdaşlarını daha çox narahat edir. Onu görə də biz paytaxtın əksər küçə və prospektlərində qabaqlayıcı tədbirlər həyata keçiririk. Keçirilən profilaktik işlər zamanı piyadalarla yol polisi səmimi söhbətlər edir,  onları maarifləndirir və  lazımi tövsiyələr verir. Çox qəribədir ki, yeraltı və yerüstü keçidlərin  yaxınlıqda olduğu bir yerdə  piyadalar ondan istifadə etmir, yüksək sürətlə hərəkət edən avtomobillərin arasından yolu keçmək istəyirlər.

Bu isə çox təhlükəlidir. Çünki yüksək sürətlə hərəkət edən avtomobil hər  an təyin olunmayan yerdən keçən piyadanı vura bilər. Qanuna əməl etməyən , piyadaya yol verməyən sürücü də var, yol hərəkəti qaydalarını kobud surətdə pozan piyada da! Bax bunların günahı, səhlənkarlığı üzündən ölümlə nəticələnən ağır qəzalar qaçılmaz olur. Düzdür, belə sürücülər və piyadalar İnzibati Xətalar Məcəlləsinin  müvafiq maddələri ilə cərimə edilirlər.

Amma bizim məqsədimiz kimisə , cərimə etmək deyil, intizama dəvət etməkdir. Və çox vaxtda buna nail oluruq. Bir də ən çox piyada  vurmalar  sutkanın qaranlıq saatlarında olur. Belə ki, yağış yağanda və yollar normal  işıqlandırılmayanda   piyadavurma hadisələr daha da çoxalır. Piyada elə bilir  ki qaranlıq havada sürücü onu yaxşı görür.

Amma bu, belə deyil, çünki sutkanın qaranlıq saatlarında , gündüz saatları ilə müqayisədə yol yaxşı görünmür. Bir qədər yağış yağanda  vəziyyət daha da çətinləşir və piyadavurma hallarının baş verməsi üçün münbit şərait yaranır! Deməli, birmənalı olaraq həm sürücülər , həm də piyadalar  daha diqqətli olmalıdırlar ki , belə  havalarda ağır qəzalar  baş verməsin!/adalet.az